BRIGADA ESKWELA 2026: BAYANIHAN PARA SA MAS MATATAG NA EDUKASYON!

Sa pagsisimula ng Brigada Eskwela 2026, muling nagkaisa ang iba't ibang sektor ng ating komunidad upang ipakita ang tunay na diwa ng bayanihan para sa kapakanan ng ating mga mag-aaral.
Sa pangunguna ni Ms. Arlene Bandoquillo, Principal I ng DepEd Tayo Florentino Joya ES - Cavite at mga kasamang Teachers, matagumpay na inilunsad ang Brigada Eskwela na dinaluhan ng ating Punong Barangay, Kapitan Edwin Ferrer bilang panauhing pandangal, kasama ang mga miyembro ng Sangguniang Barangay at mga masisipag na empleyado ng Pamahalaang Barangay ng Biga bilang pagpapakita ng buong suporta sa paaralan at sa sektor ng edukasyon.
Ang Brigada Eskwela ay hindi lamang simpleng paglilinis at pagsasaayos ng paaralan. Ito ay simbolo ng pagkakaisa, malasakit, at pagtutulungan ng bawat mamamayan upang makapagbigay ng ligtas, maayos, at kaaya-ayang kapaligiran para sa ating mga kabataan na siyang pag-asa ng bayan.
Sa ilalim ng pamumuno ni Kapitan Edwin C. Ferrer, patuloy na nakikiisa ang Pamahalaang Barangay ng Biga sa mga programang naglalayong mapaunlad ang edukasyon at kapakanan ng mga kabataan. Naniniwala tayo na ang bawat oras, pawis, at tulong na ating naibibigay ngayon ay magiging pundasyon ng mas maliwanag na kinabukasan para sa susunod na henerasyon.
Ang tagumpay ng paaralan ay tagumpay ng buong komunidad.
Kapag nagkaisa ang bawat isa, mas nagiging matatag ang kinabukasan ng ating mga mag-aaral.
Mula sa Pamahalaang Barangay ng Biga, taos-puso naming ipinapaabot ang aming suporta at pasasalamat sa lahat ng nakiisa at patuloy na nakikibahagi sa Brigada Eskwela 2026.
"Sama-sama nating ihanda ang paaralan, sama-sama nating ihanda ang kinabukasan!"